Астанада «Орталық Азия – Қытай» екінші саммитіне орайластырылған Power Central Asia + China бірінші өңірлік энергетикалық форумы өтті. Іс-шараға «Самұрық-Энерго» АҚ Инвестициялар жөніндегі бас директоры Аңсар Айдаров қатысты.
Өзінің сөйлеген сөзінде ол «Самұрық-Энерго» АҚ-ның 2060 жылға дейінгі энергетикалық көшу бағдарламасын бекіткенін атап өтті, онда жаһандық климаттық сын-қатерлерге берілетін стратегиялық жауап пен ұлттық энергобалансты трансформациялау қажеттігі көрініс тапқан. Бағдарлама декарбонизация бойынша екі сценарийді қарастырады: базалық - 2060 жылға қарай көміртегі бейтараптығына қол жеткізу, тереңдетілген - халықаралық қолдау мен озық технологияларға қол жеткізу арқылы 2050 жылға қарай шығарындыларды азайту.
Негізгі шараларға ЖЭК-ті дамыту, қолданыстағы қуаттарды жаңғырту және төмен көміртекті технологияларды енгізу кіреді. Бағдарлама ESG-күн тәртібімен байланысты: энергия тиімділігіне, экологиялық жауапкершілікке және кадрлық әлеуетті дамытуға баса назар аударылады.
«Самұрық-Энерго» АҚ Қытаймен серіктестікті Қазақстанда төмен көміртекті энергетиканы оқшаулау мен дамытуға баса назар аудара отырып, жасыл энергияны ұлғайту мен жаңғыртудың драйвері ретінде қарастырады.
