АЛМАТЫ ОБЛЫСЫНДА ЖАҢА ЖЕЛ ЭЛЕКТР СТАНЦИЯСЫ ПАЙДА БОЛАДЫ

«Самұрық-Энерго» АҚ Қазақстанның энергияға тапшы оңтүстік өңірінде жаңартылатын энергия көзінің (ЖЭК) нысанын салуда. Жобаны «Самұрық-Энергоның» еншілес компаниясы – «Энергия Семиречья» ЖШС іске асыруда. Келешекте 300 МВт-ға дейін кеңейтілетін, қуаты       60 МВт жел электр станциясы (ЖЭС) Алматы облысының Шелек ауылында орналасады.

ЖЭС орналасқан өңір энергияға тапшы. Алматы ЖЭО-лары, Қапшағай және Алматы СЭС каскадтары, Есік СЭС-і, Мойнақ СЭС-і, Қаратал СЭС-і өңірдегі электр энергиясының негізгі көздері болып табылады.

Бүгінгі таңда өзінің қуат өндіру көздері болмағандықтан, Алматы облысының электр энергиясына деген қажеттілігін жергілікті қуат көздері 50%-ке ғана қанағаттандырады.

«Шелек дәлізінде жел электр станциясын салу арқылы парник газдарын (СО2) шығару жылына 206 мың тоннаға азаяды, сондай-ақ жылына 89 мың тонна шартты отын ауыстырылады. Оның үстіне, жел электр станциясы қоршаған ортаға әсер етпей отырып, электр энергиясының қорын толықтыруға мүмкіндік береді», - деді «Самұрық-Энерго» АҚ Жобалау офисінің басшысы Ернұр Жиенбаев.

Нысанның құрылысы кезеңінде 300 жұмыс орны ашылып, станция іске қосылғаннан кейін тұрақты негіздегі 14 жұмыс орны пайда болады. ЖЭС жылына 225 750 мың кВтс электр энергиясын өндіреді деп күтілуде. Жобаның аяқталу мерзімі – 2020 жыл.

Атап өтейік, станция жиынтық қуаты 60 МВт болатын 24 жел энергетикалық қондырғыдан, қосалқы станциядан және электр желілерінен  тұрады. Нысанның агрегаттары жел станциясын автоматты басқару жүйесіне негізделген аппараттық-бағдарламалық кешен арқылы реттеледі. Бұл моделдің артықшылығы сол, оны суық континенталдық климат (–30…+43 С), 10 балдық сейсмикалық белсенділік және желдің екпіні II класс жағдайында пайдалануға болады.

Естеріңізге сала кетейік, «Самұрық-Энерго» АҚ бұған дейін ЖЭК саласындағы 2 жобаны: Қапшағай қаласындағы 2 МВт Күн электр станциясын («Samruk-Green Energy» ЖШС) және Ерейментау қаласындағы 45 МВт Жел электр станциясын («БЖЭС» ЖШС) іске асырған болатын.

 

Анықтама:

 

«Самұрық-Энерго» АҚ – Қазақстандағы аса ірі электр энергетикалық холдинг, акцияларының 100%-ы «Самұрық-Қазына» ҰӘҚ» АҚ-ға тиесілі.  2007 жылы құрылған. Жұмысының негізгі бағыттары: электр және жылу энергиясын өндіру; электр энергиясын жеткізу, бөліп-тарату және сату; энергетикалық көмір өндіру. Холдингтің құрамына энергия және көмір өндіру кәсіпорындары, соның ішінде: «Екібастұз ГРЭС-1» ЖШС, «Екібастұз ГРЭС-2 станциясы» АҚ, «Богатырь Көмір» ЖШС, «Алматы электр станциялары» АҚ, «О.Д. Қантаев атындағы Мойнақ су электрстанциясы» АҚ, «Шардара СЭС» АҚ және т.б. кіреді.

________________________________________________________________

«Самұрық-Энерго» АҚ Үкіметпен байланыс және коммуникациялар офисі 

Тел: (7172) 55-30-66; Этот адрес электронной почты защищен от спам-ботов. У вас должен быть включен JavaScript для просмотра.

2019.07.25
2019.07.25

© 2009-2018 «Самұрық-Энерго» АҚ

Сайтты дамыту Webmarka

  • Қаз
  • Рус
  • Eng